भ्रष्टाचार गर्ने र कर नतिर्नेलाई कारबाही : गृहमन्त्री

काठमाडौँ — गृहमन्त्री रामबहादुर थापाले कर नतिर्नेदेखि भ्रष्टाचारमा संग्लनहरु देशको समृद्धिको बाधक भएको बताएका छन् । सञ्चारकर्मीहरुसँग कुरा गर्दै गृहमन्त्री थापाले देशमा अस्थिरता पैदा गर्न तीन कोणबाट काम भइरहेको बताए ।

उनले पृथक् राज्यको कुरा गर्ने, हिन्दु राज्यको स्थापना गर्ने सपना देख्ने र गणतन्त्रलाई प्रतिक्रियावादी सत्ता हो भन्दै अस्थिरता पैदा गर्नेहरु गणतन्त्रको मुख्य चुनौती रहेको बताए।
गृहमन्त्री थापाले राजस्वनतिर्ने अवैध अर्थतन्त्रको जालो फैलिँदै गएको र कर छली गरेर अकुत सम्पत्ति आर्जन गर्नेहरुलाई प्रहार नगरी समृद्धि सिर्जना नहुने बताएका छन्। उनले एउटै कम्पनीले ४७ अर्ब राजस्वनतिरी बसेको सूचना पाएको भन्दै यस्ता थुप्रै उद्यमी र व्यवसायी भएको बताए। उनले कर नतिर्ने र त्यसलाई मिनाह गर्न राजनीतिक नेताकहाँ धाउने प्रवृत्ति रहेको पनि बताए।
गृहमन्त्री थापाले भन्सारमा दिनहुँ अर्बौको अवैध कारोबार हुने र त्यसलाई नरोकेसम्म अर्थतन्त्र उकालो नलाग्ने बताए। उनले भन्सार छल्ने, कर नतिर्नेहरुलाई भ्रष्ट र तस्करको संज्ञा दिँदै त्यस्ताको हातबाट देशको अर्थतन्त्र खोसेर उद्यमीहरु र देशभक्तहरुको हातमा ल्याएपछि मात्रै विकास र समृद्धि सम्भव हुने बताए। ‘कर नतिर्नु अपराध हो’, उनले भने, ‘आज हरेक क्षेत्रमा भ्रष्टाचार छ। अब गृह मन्त्रालले भ्रष्टाचार गर्ने र कर नतिर्नेलाई कानुनको सीमाभित्र रहेर कारबाही गर्छ।’
एक पटक पढ्नुहोस