गजल

• चित्र भट्टराई

न सुर छ गीतमा न ताल होस् गर्नुस्

हराउँदैछ मिठास तत्काल होस् गर्नुस्  ।

यी बाँदरहरुकै सङ्गतले हजुरलाई

बनाउन सक्छ कङ्गाल होस् गर्नुस्  ।

कतै अल्झिएर बाटैमा खस्ला

आफ्नै  त्यो कुसुमे रुमाल होस् गर्नुस्  ।

आदर्श बोकेर हिँड्छु त भन्नु भो,

हर मोडमा भेटिन्छन् दलाल होस् गर्नुस्  ।

दुईचार फिट नाघेर भेटिन्न खजाना

नाघ्नु पर्नेछ अग्लो पर्खाल होस् गर्नुस्  ।

बुद्धिचाल खेल खेल्ने हवाला दिएर

खेल देखाउँदै छ यहाँ बाघचाल होस् गर्नुस्  ।

बैगुनीको पनि गुन सम्झेर उसले

ओढाउँदैछ हजुरलाई त्रिपाल होस् गर्नुस्  ।

भात खान आइपुग्नु भो, तर भान्सामा

न तिहुँन–तरकारी छ न दाल होस् गर्नुस्  ।

यो ‘कास्टिङ्ग’ मात्रै हो खास ‘स्टोरी’त

सङ्केत गरेभन्दा छ बबाल होस् गर्नुस् ।

(गजलकार चित्र भट्टराईको ‘चकित आकाश’ गजल संग्रह प्रकाशित छ ।)