मृत्यु भएको ३६ घण्टासम्म पनि आएन कोरोना परीक्षणको रिपोर्ट, शव व्यवस्थापनमा समस्या

गत २५ गते भक्तपुर अस्पतालमा मृत्यु भएकी सुत्केरी महिलाको कोरोना परीक्षणको रिपोर्ट ३६ घण्टा बित्दा पनि आउन सकेको छैन । रिपोर्ट नआउँदा मृत्तकको शव व्यवस्थापनमा समस्या भएको छ ।

सिन्धुपाल्चोक घर भइ चागुनारायण नगरपालिकाको झौखेल बस्ने ३६ वर्षीया सन्तमाया लामाको नर्मल डेलिभरी भएको थियो ।

अस्पतालका अनुसार भर्ना हुँदा नै महिलामा खोकी, श्वासप्रश्वासमा समस्या र जाँच गर्दा छातिमा खराबी देखिएको थियो । डेलिभरी पश्चात एक्कासी श्वास फेर्न समस्या देखिएको थियो भने शरीरमा अक्सिजनको मात्रा घटेको थियो । डाक्टरको प्रयासका बावजुद उनको राति ९ बजेर ३० मिनेटमा मृत्यु भएको थियो ।

उनको आरडीटी परीक्षण गर्दा रिपोर्ट पोजेटिभ आएका ले स्वाब संकलन गरी पीसीआर परीक्षणका लागि राष्ट्रिय जनस्वास्थ्य प्रयोगशाला पठाइएको थियो ।

उपचारमा प्रत्यक्ष संलग्न स्वास्थ्यकर्मीहरुलाई सोही वार्डमा नै आइसोलेनमा राखिएको अस्पतालले जनाएको छ ।

बच्चाको अवस्था सामान्य रहेको छ भने आफन्तको समेत स्वाब परीक्षणका लागि राष्ट्रिय जनस्वास्थ प्रयोगशाला पठाइएको छ ।

एक पटक पढ्नुहोस