प्रधानमन्त्रीको वेसारे आइडोलोजीको ज्ञान जनताले मन पराएनन् : सांसद संग्रौला

काठमाडौं । प्रमुख प्रतिपक्षी दल नेपाली काँग्रेसकी सांसाद डा. डिला संग्रौलाले प्रधानमन्त्री केपी शर्मा ओलीका कारण कोरोना मजाकको विषय बनेको बताएकी छन् । मंगलबारको प्रतिनिधिसाभ बैठकमा सांसद संग्रौलाले भनिन्, मुलुकको प्रधानमन्त्रीले  कोरोना वेसार, अदुवा र हाँछ्यू गर्दा निको हुन्छ भन्ने बालहठ प्रदर्शन गर्दै गर्दा उहाँ आफै डाक्टर, वैद्य, न्यायाधिश र प्रहरी बनेको भान हुन्छ । यो विषय आज मजाक बन्न पुगेको छ । ‘

कोरोना नियन्त्रणको लागि जनताले सरकारबाट स्पष्ट मार्गचित्र र पहलकदमी खोजेका भनद्यै आफ्नो कमजोरी छोप्न कथित वेसारे आइडोलोजीको ज्ञान जनतालाई मन नपराएको बताइन् । मुलुक अहिले अत्यन्त कठिन, असहज र जटिल परिस्थितिबाट गुज्रिरहेको भन्दै जनता कोरोना भाइरस, भ्रष्टाचार र बलात्कारबाट मुक्ति दिनु राज्यको दायित्व भएको बताइन् ।

सांसद संग्रौलाले भनिन्, ‘सरकार दिनप्रति दिन असंवेदनशील, अकर्मणिय, अनुदार र विवादित बन्दै गइरहेको छ । सरकारको नेतृत्व गर्ने प्रधानमन्त्री नै जिम्मेवार बन्दैनन् भने अरु मन्त्रीको के कुरा गर्ने । यो पहिलो भाइरस कोरोना जसले विश्व समुदायलाई नै तर्साएको छ, भयभित बनाएको छ । आजको दिनसम्म हेर्ने हो भने नेपालमा कोरोना संक्रमितको संख्या ९५६१ पुगिसकेको छ र मृतकको संख्या २३  छ ।’

कोरोनाको दर दिन प्रतिदिन बढिरहँदा नियन्त्रणको लागि सरकारको व्यवस्थापन पक्ष कमजोर र फितलो देखिएको उनको भनाइ छ । कोरोना जस्तै अर्को खतरनाक भाइरस भ्रष्टाचार बन्न पुगेको उनले बताइन् ।

उनले भनिन्, ‘भ्रष्टाचार नियन्त्रणमा सरकारको अकर्मण्यता र असक्षमता प्रदर्शन भइसकेको छ । एकतिर कोरोनाको पीडा छ भने अर्कोतिर जनताको करबाट उठेको पैसामा सरकारको भ्रष्टाचारको रजाइ छ । यस्तो खतरनाक भाइरसले नेपालीलाई पीडा वोध गराएको छ । राष्‍ट्र विपदमा परेको बेलामा पनि स्वास्थ्य सामग्री खरिद जस्तो विषयमा सरकार निरन्तर भ्रष्टाचारमा जोडिनु निर्लज्जताको पराकाष्ट हो । चाहे ओम्नी समूहसँग स्वास्थ्य सामाग्री खरिदको भ्रष्टाचार होस् या सेनासँग जीटुजी सम्झौता गरी खरिद गरिएको सामाग्रीमा भ्रष्टाचार, खरिपाटी क्वारेन्टिनमा औषधी नै नखाइ चौहत्तर लाखको विल पेश गर्ने भ्रष्टाचार नेपाली समाजका कलंक हुन् ।’

नेपाली समाजको अर्को खतरनाक भाइरस महिलामाथिको हिंसा र बलात्कार भएको उनले बताइन् । सांसद संग्रौलाले भनिन्, ‘लकडाउनमा हरेक दिन पाँच महिलामाथि बलात्कार भइरहेको छ । कोरोनाको कहरभित्र पनि लकडाउनको ८३ दिनमा नेपालमा बलत्कारका घडघ वटा घटना घटेका छन् । अन्य हिंसात्मक घटनाको त कुरै नगरौं । विश्‍व स्वास्थ्य संगठनले पनि विश्‍वभरि नै १० प्रतिशत घरेलु हिंसाबाट महिलाहरु शिकार भएको, बलत्कार र हिंसाको घटना घटिरहेको प्रतिवेदन सार्वजनिक गरिसकेको छ ।’

नेपालको संविधानले महिला तथा बालबालिकाहरुमाथि कुनै पनि हिंसाजन्य कार्य गर्न नहुने, सुरक्षित र सम्मानजनक जीवन बाँच्न पाउने अधिकारलाई मौलिक हकको विषयमा राखेको उनले बताइन् ।

उनले भनिन्, ‘विडम्वना नै भन्नुपर्छ, कैलालीको लम्किचुवा नगरपालिकाको क्वारेन्टिनमा सरकारले खटाएका स्वयम् सेवकहरुबाट नै महिलामाथि सामूहिक बलत्कार हुन्छ भने महिलाको सुरक्षा कहाँ हुन्छ ? सरकारको मौनताको कारण अपराधि खुलेआम शिर ठाडो पारी हिडिरहेका छन्, अपराधिलाई कानुनको कठघरमा ल्याई सजाय दिन सरकार चुकेको छ । त्यसैले महिला हिंसा, बलत्कार जस्ता अमानवीय, घृणित, पासविक घटना तत्काल रोक्न र दोषिलाई कडा भन्दा कडा कारवाही गर्न सभामुख मार्फत् सरकारको ध्यान आकर्षण गराउन चाहन्छु ।’

एक पटक पढ्नुहोस