‘संक्रमित छौं, तर बिरामी भएको अनुभूति छैन’

३२ साउन, सप्तरी । ‘हामी जुन बैठकमा सहभागी भएका थियौं, त्यहाँ उपस्थित तीन जना कोरोना संक्रमण भएछ, तपाई पनि पीसीआर जाँच गराउनुस् है’ पूर्व क्रिकेटर पवन दासलाई साउन तेस्रो साता फोनमा एक जनाले सुनाउँछन् ।

उनी राजविराजस्थित गजेन्द्रनारायण सिंह अस्पताल पुगे र, आफूसँगै आमा र बुवाको पनि स्वाब दिए । स्वाब दिए पनि रिपोर्ट के आउने हो भनेर तनानव भइरह्यो । ‘रिपोर्ट नेगेटिभ आओस् भन्ने कामना गरिरह्यौं’ उनले भने, ‘तर रिपोर्ट पोजेटिभ आयो ।’ २४ साउनमा आएको रिपोर्टमा ३४ बर्षका उनीसहित उनका ६२ बर्षीय बुवा र ६१ बर्षीया आमा पनि पोजेटिभ देखिए ।

राजविराज दासले सन् २००२ मा दक्षिण एसियाको यू–१५ ड्रिम टिममा नेपालको प्रतिनिधित्व गर्दै खेलेका थिए । तर पछिल्लो समय जिल्लास्तरीयमा सिमित भएका उनले उद्योग वाणिज्य संघ, सप्तरीको कार्यालयमा काम गर्न शुरु गरेका थिए । साउन दोस्रो साता महोत्तरीको बर्दिवासमा आयोजित प्रदेशस्तरीय बैठक सहभागी हुन गएका थिए । दुई दिनको बैठक सकेर उनी राजविराज फर्किए ।

निषेधाज्ञा भएकाले घरमा परिवारसँगै थिए । बर्दिवासबाट फर्किएको एक सातापछि बैठकमा सहभागीमध्ये एक जनाले फोनमा सुनाएको सहभागीमध्ये तीन जनालाई कोरोना संक्रमण पुष्टि भएको भन्दै परीक्षण गराउन आग्रह गरे ।

त्यही आग्रह अनुसार परीक्षण गराउँदा उनीसँगै आमा र बुबामा पनि संक्रमण देखिएको थियो । त्यसपछि उनकी श्रीमती, ६ वर्षकी छोरी र डेढ बर्षका छोराको स्वाब संकलन भयो । ३० साउनमा आएको रिपोर्टमा श्रीमतीमा कोरोना संक्रमण देखिएन तर छोराछोरीमा देखियो । दासले अनलाइनखबरसँग भने, ‘छोराछोरीसमेत संक्रमित देखिएपछि धेरै डर लाग्यो ।’

तर उनीमा लक्षण थिएन । दासका अनुसार उनलाई शुरुमा टाउको दुःखेको थियो, अहिले अवस्था सामान्य छ । उनले भने, ‘हामी संक्रमित छौं, तर बिरामी भएको अनुभूति छैन । केही दिन खानाको सुगन्ध हराउनुबाहेक अरु परिवर्तन देखिएन ।’

सबै होम आइसोलेसनमा

एकसाथ तीन जनामा संक्रमण पुष्टि भएपछि स्वास्थ्य कार्यालयसँग सल्लाह लिएर उनी घरभित्रै आइसोलेट भए । बच्चा पनि पोजेटिभ देखिएपछि सबै घरमै बसे । सबैको रेखदेख भने संक्रमण नभएकी पवनकी श्रीमतीले गर्दै आएकी छन् ।

सबैका लागि खाना पकाउने, समयमा तातो पानी दिनलगायतका सबै काम उनी एक्लै गर्दै आएको दास बताउँछन् । ‘अहिले उनी मेरो श्रीमती मात्र नभई आइसोलेसनमा रेखदेख गर्ने नर्सको भूमिकासमेत निर्वाह गरिरहेका छन्’ उनी भन्छन्, ‘हामी चाँडो नै कोरोना संक्रमणमुक्त हुने विश्वास छ ।’

सामाजिक दूरी कायम राख्न, मास्क लगाउन, आवश्यक पर्दा मात्रै घरबाट बाहिर जान आग्रह गर्दै उनले भने, ‘संक्रमित भइहाले पनि डराउने काम नगरौं ।’

एक पटक पढ्नुहोस