माधव समूहको भेलामा पाण्डे र भुसालको ब्रिफिङ : बालुवाटारले भुल्याउन मात्रै खोज्यो

नेकपा एमालेको झलनाथ खनाल र माधवकुमार नेपाल समूहको भेला बिहीबार भर्चुअल माध्यमबाट भएको छ । मध्यान्ह १२ बजेदेखि सुरु भएको भेलामा सुरुमै नेता माधव कुमार नेपालले धारणा राखेका थिए । उनले एमालेभित्रको विवाद र विकसित परिस्थितका बारेमा कुरा सुरु गर्दै आफ्नो समूहका नेताहरुको धारणा सुन्न भेला आयोजना गरिएको बताएका थिए ।

‘तपाईँहरुका कुरा सुनौं, विकसित परिस्थितिको मुल्यांकन गरौ भनेर यो छलफल राखिएको हो । सवैको धराणा सुनेर अघि बढ्न सहज हुने ठानेर भेला गर्नुपरेको हो’, नेता नेपालको भनाई उधृत गर्दै एक केन्द्रीय सदस्यले भने, ‘पार्टी एकताका लागि अनौपचारिक ढंगले केही साथीहरुले कुरा पनि गरिराख्नु भएको छ । तर खासै उपलव्धी भैसकेको छैन ।’

नेता नेपालपछि अर्का बरिष्ठ नेता झलनाथ खनालले सम्बोधन गरेका थिए । खनालले अध्यक्ष ओलीको कार्यशैलीका कारण कम्युनिस्ट पार्टी छिन्नभिन्न भएको भन्दै यसलाई बचाउनु सवैको कर्तव्य भएको बताएका थिए । तर उनले ओलीका गतिविधि सच्चिने तर्फ अझै नदेखिएको धराणा राखेका थिए ।

‘ओलीका गतिविधि अझै सच्चिने तर्फ गएको देखिँदैन’, खनालको भनाइ थियोे ।
छलफलमा नेता सुरेन्द्र पाण्डे र घनश्याम भुसालले ओली पक्षका नेताहरुसँग भएको अनौपचारिक छलफलबारे ब्रिफिङ गरेका थिए । पाण्डे र भुसाल दुवैले ओली पक्षले वार्ताका नाममा भुल्याउन मात्रै खोजेको आफुहरुलाई भान भएको बताएका थिए ।

पार्टी विवाद समाधान गर्न गठित १० सदस्यीय कार्यदलका नेतामध्ये भीम रावललाई ओलीले कारवाही गरेपछि सुरेन्द्र पाण्डे, घनश्याम भुसाल, गोकर्ण विष्ट र योगेश भट्टराईले ओली पक्षसँग छलफल गरेका थिए । तर संस्थापन पक्षसँगको छलफलले ठोस प्रगति र आकार ग्रहण गर्न नसकेको पाण्डे र भुसालले छलफलमा ब्रिफिङ गरेको एक केन्द्रीय सदस्यले रातोपाटीलाई बताए ।

‘ओली पक्षबाट वार्तामा बसौं भन्ने कुरा आयो । पार्टी मिल्छ भने संवाद गर्दैमा केही बिग्रिदैन भनेर हामीले पनि प्रयास गर्यौ र बस्यौँ तर प्रयोग गर्न खोजेको जस्तो अनुभुति भयो,’ पाण्डेको भनाइ उदृत गर्दै माधव पक्षका एक नेताले रातोपाटीलाई बताए ।

बोल्ने अन्य नेताहरुले भने ओलीको भुलभुलैयामा लाग्न नहुने सुझाव दिएका थिए । उनीहरुले स्पष्ट कार्यदिशासहित अघि नबढे कम्युनिस्ट आन्दोलनमा थप क्षती हुने धराणा राखेका थिए ।

छलफलमा करिव ७५ जना जोडिएको बताइएको छ ।

एक पटक पढ्नुहोस