स्थानीय तहमा जनप्रतिनिधिहरुले जिम्मेवारी सम्हालेको डेढ बर्ष पुगेको छ । यस अवधिमा जनप्रतिनिधिहरु पनि विकास निर्माणको काम गर्न लागि परेका छन् । तर अपेक्षाकृत रुपमा परिणाम भने निकाल्न सकेका छैनन् । सडक, विद्युत, खानेपानी लगायतको क्षेत्रमा नागरिकहरुले परिवर्तनको आशा र अपेक्षा गरेका छन् । नमोबुद्ध नगरपालिका वडा नं. ४ का वडा अध्यक्ष अर्जुन बहादुर कार्कीले पनि विकास निर्माणको काम गर्न आफू अहोरात्र लागि रहेको बताउछन । यसै विषयमा वडाको विकास निर्माणको लागि गरेको प्रयास र आगामी योजना लगायतको विषयमा केन्द्रीत रहेर मिडिया दर्पण डट.कमले गरेको कुराकानी
– अहिले के मा व्यस्त हुनुहुन्छ ?
निर्वाचित हुनु अगाडी र निर्वाचित भएपश्चातको मेरो दिनचर्या बदलिएको छ । निर्वाचित भएपश्चात सामुदायिक विकास र निर्माणका कार्यहरु संचालन गर्ने, समुदायभित्रका समस्याहरु समाधान गर्ने र म न्यायिक समितिको सदस्य समेत भएको हुँदा समग्र नगरभित्रका उजुरीहरु उपर न्यायिक समितिमा क्रियाशील छु ।
–तपाईंले नमोबुद्ध न.पा. वडा नं. ४ मा चुनाव उठिरहँदा त्यसबेला बोलेको बाचा जनताहरुको कति पुरा गर्नुभयो ?
हामीले निर्वाचनमा गरेको बाचा कार्यकाल भरिमा शतप्रतिशत पुरा गर्ने लक्ष्यमा अगाडी बढिरहेका छौँ । यस बीचमा वडाका लगभग सबै घरबस्तीलाई स्थानीय सडक सञ्जालमा जोडिएको छ, वडाका मुख्य सडकहरु बाह्रै महिना संचालन हुने अवस्थामा छन्, सबै घरधुरीमा खानेपानीको लागि एक घर एक धारा उपलब्ध गराईएको छ, प्रदेश स्तरीय मेथिनकोट अस्पतालबाट गुणस्तरीय स्वास्थ्य सेवा उपलब्ध गराईएको छ, अस्पतालमा मात्र सुत्केरी गराउनको लागि एम्बुलेन्स भाडामा सहुलियत प्रदान गरिएको छ, र यस्ता अन्य थुप्रै कार्यहरु गरिएका छन् ।
– तपाईंको वडाभित्र विकास निर्माणको कार्य कसरी अगाडी बढेको छ ?
हामीले साना योजनालाई उपभोक्ता समिति मार्फत कार्यान्वयनमा ल्याएका छौँ, २ करोड लागतको जयटार–चुवाने सडकको काम ठेक्काबाट भइरहेको छ, वडाका महत्वपूर्ण विकासका सवालहरुमा सबै दल एकजुट भएर आपसी समझदारीमा समन्वय गर्दै कामहरु अगाडी बढाएका छौँ ।
– यस नगरपालिका भित्र यस वडाको सडकको अवस्था कस्तो छ ?
यस वडाका लगभग सबै घरबस्तीमा स्थानीय सडक पुगेको अवस्था छ । करिब ४५ कि.मि. सडक भएको यस वडामा ४ कि.मि.
पक्की÷पिच गरिएको छ र बाँकी ग्राभेल÷कच्ची बाटो छन् । बाह्रै महिना सवारी आवागमन गर्नको लागि केही सडकहरु स्तरोन्नती गरिएको र केही गरिने कार्ययोजनामा छ ।
– तपाईको वडामा कतिवटा विद्यालय छन् र शिक्षा क्षेत्रको सुधारको लागि के–के काम गरिरहनु भएको छ ?
यस वडामा १ वटा बहुमुखी क्याम्पस, १ वटा नमुना माध्यामिक विद्यालय, १ वटा आधारभुत विद्यालय, १ वटा प्राथमिक विद्यालय, १ वटा बालकक्षा संचालनमा छन् । यहाँका सरकारी विद्यालयमा गुणस्तरीय शिक्षा भएको कारण विद्यार्थी संख्या पर्याप्त छन् । विद्यालयहरुको भौतिक पूर्वाधारहरु भवन, खेलमैदान, प्रयोगशाला निर्माण, जनशक्ति व्यवस्थापन लगायतका विषयमा यस वडाले सहयोग गरिरहेको छ ।
– निर्वाचन हुनु अगाडिको गाउँ र तपाईं निर्वाचित भएर आउपछिको गाउँमा के फरक बनाउनु भयो ?
हामी निर्वाचित भएपश्चात यस अगाडी गरिएका विकासका कार्यलाई निरन्तरता दिइएको र नयाँ योजनाहरु कार्यान्वयनमा छन् । हामीले गरेका विकासका प्रयासहरु मार्फत क्रमशः नतिजा देखिने क्रममा छन् ।
– निर्वाचनमा जे प्रतिबद्धता गर्नुभएको थियो । त्यो अनुसार काम गर्न सक्नुभएको छ कि छैन ?
हामी समस्यामुक्त हुन त कहिल्यै नसकौँला । यद्यपी निर्वाचनका क्रममा हामीले गरेका प्रतिबद्धताहरु क्रमशः पुरा हुँदैछन् । खानेपानी, सडक, कृषि सामग्री, शिक्षा, स्वास्थ्य लगायतका क्षेत्रमा गुणस्तरीयता, निरन्तरता र स्तरीयतामा वृद्धि गर्दै लैजाने हाम्रो प्रयास जारी छ । हामीसँग भएको सिमित साधन श्रोतलाई अधिकतम परिचालन गरि बढीभन्दा बढी समस्या समाधानका लागि हामी प्रयासरत छौँ । साधन श्रोतको न्युनताले समस्या चाहिँ पारेको छ ।
– वडाभित्र खानेपानी, विद्युत र स्वास्थ्य क्षेत्रमा के–के काम गर्दै हुनुहुन्छ ?
खानेपानी तथा सरसफाईको लागि एक घर एक धारा लगभग पुरा भएको छ, सबै घरधुरीमा विद्युत पुगेको र सबै ठाउँमा काठको पोल विस्थापन गरी स्टिल पोल राख्ने कार्य अन्तिम चरणमा पुगेको छ, पुर्ण खोप भएको, प्रदेश स्तरको अस्पतालबाट गुणस्तरीय र सुलभ स्वास्थ्य सेवा प्रवाह भईरहेको अवस्था छ ।
– सामाजिक विकृति पनि समाज निर्माणको बाधकको रुपमा देखिँदै आएको छ । जाँड रक्सी र जुवातास नियन्त्रण गर्नको लागि के योजना बनाउनुभएको छ ?
सामाजिक विकृति त हाम्रो विकासको बाधक नै हो । यस वडामा जुवातासको समस्या त खासै अहिले देखिएको छैन तर जाँड रक्सीको समस्या समाधानको लागि घरेलु मदिरा नियन्त्रणका लागि जनचेतना फैलाउने, परामर्श गर्ने तथा प्रहरी प्रशासनसँगको समन्वयमा नियन्त्रणका उपायहरु अपनाइएको छ ।
– कृषि क्षेत्रको सुधार गर्नको लागि के पहल गरिरहनु भएको छ ?
कृषि क्षेत्रको विकास उन्नतिको प्रथम विन्दु हो । हामीले कृषि क्षेत्रको आधुनिकीकरणका लागि ५० प्रतिशत अनुदानमा कृषि औजार वितरण गरिएको, साना सिँचाईका योजनाहरु, आलु पकेट क्षेत्र कार्यान्वयनमा ल्याइएको, विषादी रहित अर्ग्यानिक तरकारी उत्पादन कार्ययोजना संचालनमा रहेको, उन्नत बीउबीजनका लागि बिउ बैंक संचालनमा रहेको, रसायनिक मलको आपूर्तिको लागि सम्बन्धित निकायहरुमा समन्वय र सम्पर्क गरिएको आदि कार्यहरु गरिएको छ । व्यवसायिक पशुपालनका कार्यक्रमहरु संचालन गरिएको, हाइब्रीड बीउबीजन उत्पादन, प्लाष्टिक पोखरी, टनेल खेती, थोपा सिंचाई जस्ता आधुनिक प्रविधिलाई प्रयोगमा ल्याईएको छ ।
– अन्तमा केही छ की ?
हाम्रो गतिविधिको बारेमा प्रश्न सोधेर जवाफ दिने र आम जनतालाई सूचना प्रदान गर्ने अवसर प्रदान गर्नुभएकोमा यहाँ लगायत मिडिया दर्पण डट.कमलाई धेरै धन्यवाद व्यक्त गर्दछु । यहाँहरुको लोकप्रिय अनलाईन मार्फत यस वडाको अहिले सम्मको काम र समस्याको बारेमा केही कुरा राख्न दिनु भएकोमा धन्यावाद दिन चाहान्छु । हामीलाई यहाँहरुको सधैव साथ र सहयोग आवश्यक पर्छ । अहिले सम्म करीब म निर्वाचन भएपछिको वडाको विकासको र कामका केही शब्द राख्न पाउँदा र वडाको समस्या र विकास निमार्ण कसरी भईरहेको छ भन्ने विषयमा यहासगँ प्रष्ट कुरा राख्न मौका दिनु भएकोमा धेरैधेरै धन्यावाद दिन चाहान्छु ।