नेपाली सेनामा स्वीकृत दररेटभन्दा बढी भुक्तानी गरेर अनियमितता !

प्रधानसेनापति पूर्णचन्द्र थापाले संगठनभित्र हुने भ्रष्टाचारविरुद्ध सफाइ अभियान चलाएयता उपरथीदेखि सेनानीसम्म दर्जनौँ सैनिक अधिकृत कारबाहीमा परिसके । तर, प्रधानसेनापतिको ‘कुचो’ले सेनाको रासनमा हुने अनियमितताको जालो भने अझै पन्छाउन सकेको छैन ।

सेनाको रासन ठेक्का हात पार्न ठेकेदारहरु कुन हदसम्म जान्छन् र कसरी युनिटका हाकिमहरुलाई प्रलोभनमा पारेर नाजायज नाफा कमाउँछन् भन्ने सेनाको लागि खरिद हुने दूधमा भइरहेको चलखेलले देखाउँछ ।

नेपाली सेनाको स्वीकृत रासन स्केलअनुसार प्रत्येक सैनिकलाई महिनामा आधा–आधा अर्थात १५ दिन होल्क मिल्क पाउडर र १५ दिन गाईभैँसीको दूध खुवाउनुपर्छ । व्यवहारमा भने देशैभर सेनालाई होल्क मिल्क खुवाउने गरेको पाइँदैन । झट्ट हेर्दा सामान्य लागे पनि यसभित्रको चलखेलको कथा डरलाग्दो छ । दूधमा मात्रै मासिक करोडौँ रुपैयाँ अनियमितता हुने गरेको छ ।

सेनाको रासन ठेक्का हात पार्न ठेकेदारहरुले बजारमा प्रतिकिलो ७५० रुपैयाँ पर्ने होल्क मिल्क पाउडरको दर ८० देखि १५० रुपैयाँसम्म राखेर टेन्डर भर्छन् । प्रतिलिटर ५०–६० रुपैयाँ पर्ने डेरीको दूधमा भने ८०–९० रुपैयाँ राखिन्छ । सम्झौताअनुसार होल्क पाउडर खुवाउने हो भने ठेकेदारलाई ६०० प्रतिशतसम्म घाटा लाग्छ । त्यसमाथि, पाउडर दूध प्याकेटमा आउने हुँदा मिसावट गर्न सजिलो हुँदैन ।

त्यसैले, युनिटका हाकिमहरू र खाद्य निर्देशकसँग ठेकेदारले सेटिङ मिलाउँछन्, अनि महिनैभर डेरीको दूध सप्लाई हुन्छ । यसरी सप्लाई गर्दा ठेकेदारलाई त नाफा हुने नै भो, युनिट हाकिमहरू र खाद्य विभागका निर्देशकले पनि राम्रै हिस्सा पाउँछन् । तर, राज्यले भने यसको ठूलै मूल्य चुकाउनुपर्ने हुन्छ । सेनाको दूधमा गरिने यो चलखेलबाट मात्रै राज्यले वार्षिक १९ करोड घाटा बेहोरिरहेको छ ।

स्वीकृत रासन स्केलअनुसार प्रत्येक सैनिकलाई एक दिनमा १५ ग्राम होल्क मिल्क पाउडर वा १५० मिलिलिटर डेरीको दूध आलोपालो गरी खुवाउनुपर्छ । होल्क मिल्कको टेन्डर मूल्य प्रतिकिलोग्राम सरदर १०० रुपैयाँका दरले हिसाब गर्दा एक सैनिकका लागि एक दिनमा १ रुपैयाँ ५० पैसा खर्च हुन्छ ।

डेरीको दूधमा भने प्रतिलिटर ८३ रुपैयाँ स्वीकृत रेट छ । यस हिसाबले एक सैनिकका लागि एक दिनको खर्च १२ रुपैयाँ ४५ पैसा पर्न जान्छ । महिनामा आधा–आधा दिन होल्क मिल्क र डेरी मिल्क खुवाउने हो भने औषतमा एक सैनिकको एक दिनको दूधमा ६ रुपैयाँ ९७ पैसा खर्च हुन्छ ।

महिनैभर डेरीको दूध खुवाउँदा भने यो खर्च १२ रुपैयाँ ४५ पैसा हुन जान्छ । यसरी, होल्क मिल्क नखुवाई डेरीको दूध मात्र खुवाउँदा प्रतिसैनिक स्वीकृत दररेटभन्दा प्रतिदिन ५ रुपैयाँ ४८ पैसा ज्यादा खर्च हुन्छ ।

 

 

 

 

 

 

 

 

 

 

 

 

 

 

 

एक पटक पढ्नुहोस